என்னவென்பதாம்?? ஆகஸ்ட் 31, 2006

உன்னால் கவிதை
படைக்கும்
நான் கவிஞனெனில்
உன்னை படைத்த
உன் பெற்றோரை
என்னவென்பதாம்??

அறிவியல் விதி ஆகஸ்ட் 31, 2006

இது
நியூட்டனின் எத்தனாவது விதியென
கண்டறிய வேண்டும்;

எந்நிலையிலும்
நீ கடக்கும் வேளையில்
கண்கள் தாமாகவே
உனது பிம்பத்தை
நோக்கி நகும்.

சுற்றுலா ஆகஸ்ட் 9, 2006

இரண்டு மாதமாய்
திட்டமிட்டு,
‘இந்த வாரம் ஊருக்கு வரமாட்டாயா?’
செல்லச் சண்டையிட்ட அம்மாவிற்க்கு
சமாதானம் சொல்லி,
அலுவலகத்தில்
விடுமுறை போராட்டம்
ஒன்று செய்து;
சொகுசு ஊர்தியிலும்
சுகமில்லா நீண்ட பயணம்
செய்ததெல்லாம்,
என்றோ
உதறிவிட்டு வந்த
மலைகளையும் காடுகளையும்
காணத்தான் !

என்ன மாயமோ ??? ஆகஸ்ட் 9, 2006

எத்தனையோ காலமாய்
இதே வழியில்
பயணித்திருந்தாலும்
 
அந்த தெருமுனை
பெட்டிக்கடையும்
மந்தமாய் விளக்கெரியும்
மளிகைக்கடையும்
இப்போதுதான்
பளிச்செனப் புலப்படுகின்றன

உன் பெயரின்
மாயமாய்
இருக்குமோ?

மழை தருமோ மேகம் ?! ஆகஸ்ட் 9, 2006

நீ கூந்தல் துவட்ட,
என் மேல்
தெறித்த
நீர்த்துளிகள் தான்
உறுதி செய்தன
மழை மேகம் கருப்பென்பதை.

நீயில்லாமல்… ஆகஸ்ட் 9, 2006

பேருந்துக்கான
நீண்ட காத்திருப்பும்,

பெருங்கூட்டத்திலும்
உறுத்தும் தனிமையும்,

பக்கத்து இருக்கையின்
பரிச்சயமில்லா முகமும்,

நெடும் பயணத்தில்
நெருடும் அமைதியும்,

நீயில்லாத வெறுமையை
வெகுவாய் குத்திக்காட்டுகிறது.